Au üs hed de Vegetarisch/Vegan Food-Trend erreicht - mer send jo offe för alles :)

Somet geds es, dass mer emmer Linse dehei hend ond au emmer öppe chli Tofu oder Bratchäs. Das hebt alles super lang ond so cha mer au gsond choche, wenn de Chüelschrank söscht nömm so vell här ged.

Linse macht mer wie Riis ond gfendet mer ide Migros au bim Riis. Öppe e Hampfele pro Person i Bouillon 10-20 Minute (je noch Sorte) köcherle.

Variante 1:

Mer gheit i die kochende Linse Sparglestöckli dri ond ganz vell Currygwörz.

Variante 2:

Mer gheit verschednigs Gmües (z.B. Broccoli, Rüebli, Peperoni, Zucchetti) ond verschednigs Gwörz (z.b. Knobli, Ingwer, Zimt, Koriander, Chili) noch loscht ond luune dri, denn geds en leckere Gmües-Linse-Eitopf. Riibchäs obedruf machts ned gsönder aber feiner.

Variante 3:

Mer schniidet währendem Koche vo de Linse es paar Früchte (z.B. Öpfu, Bere, Mango, Banane). Nocher d'Linse abschrecke oder abküehle lo ond d'Früchte met ehrem eigete Saft zo de Linse gäh ond den geds en leckere Fröcht-Linse-Salot. s'Pönktli ofem i esch do, wenn mer no paar verhackti Minze-Blätter dritued.

Variante 4:

Mer brötlet parallel zom Koche vo de Linse en Bratchäs oder chli Tofu ond mischt am Schloss no d'Linse dezue. Als Sauce chamer z.B. met es paar Chrüter wo mer no moss bruuche, paar Nöss ond chli Chäs ond Olivenöl en Pesto stabmixere. Je noch wörzi vom Tofu bruuchts aber gar kei Sauce.

En guete!